د افغانستان حکومت په پروان کې د وسلو پر دیپو د برید په اړه تحقیقات پیل کړل

abdul abdul

د افغانستان حکومت په پروان کې د وسلو پر دیپو د برید په اړه تحقیقات پیل کړل

  • خپرونکی:

تاند- د افغانستان حکومت په پروان ولایت کې د وسلو پر یوې دیپو د امریکايي پوځیانو د دوشنبې د ورځې د حملې په اړه د تحقیقاتو غوښتنه وکړه.

الوزول شوې دیپو د بایان په سیمه کې د یوه پخواني جهادي قومندان جان احمد په کور کې وه.

اجرايي رييس عبدالله عبدالله د دې حملې په اړه، چې له کبله یې مرګ ژوبله او تاوانونه نه دي پېښ شوي، د پلټنو امر کړی دی.

ده ویلي چې له ولسمشر غني او د ناټو تر مشرۍ لاندې د غوڅ ملاتړ د ماموریت له قومندان جنرال کمبل سره یې خبرې کړي دي.

له حملې وروسته د سیمې یو شمېر اوسېدونکو د احتجاج په دود مظاهره وکړه او ویې ویل چې باید سلاکوټ تر ویجاړولو مخکې بل ځای ته وړل شوی وای.

د عبدالله عبدالله یوه ویاند فیصل جاوید وویل:«سیمې ته یو پلاوی د تحقیق لپاره استول شوی او د غوڅ ملاتړ له قومندانانو غوښتل شوي چې د حملې په اړه توضیح ورکړي.»

د ناټو تر مشرۍ لاندې د غوڅ ملاتړ ماموریت چارواکي وايي چې د مهماتو دیپو د دې لپاره ویجاړه کړای شوه چې له دغو وسلو څخه په استفادې پر افغان او نړیوالو ځواکونو د حملې مخه ونیول شي.

د ناټو ویندوی ډګروال برېن تریبس وویل چې دا عملیات د پروان ولایت په مرکز په چاریکار کې وشول.

د پروان امنیه قومندان جنرال محمد زمان وویل، افغان امنیتي ځواکونو هم په دې عملیاتو کې برخه لرله.

زمان وویل، د سیمې اوسېدونکو د حملې په اعتراض کې په چاریکار کې مظاهره وکړه. دوی په دې احتجاج کاوه چې وسله ولې له هستوګنې سیمې لېرې ویجاړه نه شوه.

فیصل وویل چې مظاهره چیانو د کابل – سالنګ لویه لاره بنده کړه خو کله چې اجرايي رييس له دوی سره خبرې وکړې، مظاهره یې پای ته ورسوله.

په عین وخت کې ویل شوي چې ویجاړ شوی سلاکوټ د شمال د پخوانۍ ټلوالې په یوه قومندان پوري اړوند و او دولتي وسلې یې پر وسله والو طالبانو خرڅولې.

Comments are closed.


Hit Counter provided by technology news