پاکستان وايي، د افغان طالبانو پر ضد د جګړې په خاطر امریکا ۳۳۶م ډالره ورکړل

nawaz-guni

پاکستان وايي، د افغان طالبانو پر ضد د جګړې په خاطر امریکا ۳۳۶م ډالره ورکړل

تاند- پاکستاني رسنۍ وايي چې د امریکا متحدو ایالتونو د پاکستان حکومت ته په ګاونډي افغانستان کې د طالبانو پر ضد په جګړه کې د رول په خاطر ۳۳۶ ملیون ډالره ورکړي دي.

د پاکستان مرکزي بانک (سټېټ بانک) وايي چې د امریکا د مرستو له کبله د پاکستان د بهرنیو اسعارو زېرمه ۱۹ ملیارد ډالرو ته لوړه شوې ده.

پاکستان ته د ايتلاف د ملاتړ بسپنه (Coalition Support Fund) په ۲۰۰۱ میلادي کال وروسته له دې پیل شوه چې دغه هیواد په افغانستان کې د القاعده او طالبانو ضد ايتلاف کې شامل شو.

د (دي نیوز) ورځپاڼې د راپور پر اساس پاکستان لا هم امریکا ته د مالي مرستو په بدل کې خپلې هوايي اډې او نور امکانات ورکوي.

د پاکستان مرکزي بانک په یوه لنډه خبرپاڼه کې ویلي چې د ايتلاف د ملاتړ پروګرام پر اساس یې ۳۳۶ ملیونه او ۸ لکه ډالر ترلاسه کړي او دا د روان مالي کال، چې د ۲۰۱۶ کال په جون کې پای ته رسېږي، د یو نیم ملیارد ډالري مرستې لومړۍ برخه ده.

د (دي نیوز) ورځپاڼې د راپور پر اساس، پاکستان له پیله تراوسه پوري د ايتلاف د ملاتړ د پروګرام له مخې ۱۳ ملیارد ډالره ترلاسه کړي دي.

Comments are closed.


Hit Counter provided by technology news