د امریکایانو بمبار دا ځل په لوګر کې افغانان ووژل

grap

 اګست 30, 2017

نن ټکی اسیا (چهارشنبه، ۸ وږی، ۱۳۹۶): د امریکايي ځواکونو د بمباریو په لړ کې دا ځل په لوګر ولایت کې د خلکو کورونه په نښه شوي او لږ تر لږه ۲۸ افغانانو خپل ژوند له لاسه ورکړی.

په پیښه کې ګڼ کورونه ویجاړ شوي او په وژل شوو کې ښځې او ماشومان هم شامل دي.

د لوګر والي ویاند سلیم صالح تائید کړې چې امریکایانو د مرکز په دشت باري سیمه کې بمبار کړی.

په هیواد کې د ورته پیښو وروسته د یو «تحقیقاتي هیئت د لیږلو» خبر د معمول تقاضا ده او تمه کیږي چې دولت به یادې سیمې ته هم تحقیقاتي پلاوی واستوي.

وړمه ورځ د هرات ولایت په شینډنډ ولسوالۍ کې امریکايي بې پيلوټه الوتکو ۳۵ ښځې، ماشومان او لویان ووژل. د هرات ولایتي چارواکو وویل چې د تحقیقاتو لپاره یې سیمې ته پلاوی لیږلی. په عین حال کې دفاع وزارت هم اعلان وکړ چې یو تحقیقاتي پلاوی به شینډنډ ته ولیږي. نوموړي وزارت خو د بمبار پړه هم په خپله غاړه واخیسته او ویې ویل چې بمباري امریکایانو نه ده کړې.

په روانه اونۍ کې دا دریم ځل دی چې عام افغانان تر امریکايي بمونو لاندې وژل کیږي. د شینډنډ تر پیښې مخکې د تیرې شنبې په ورځ امریکايي الوتکو د کندز ولایت د چهاردرې ولسوالۍ په نهرصوفي سیمه کې ۱۱ عامو افغانانو ته مرګ ژوبله واړوله.

طالبانو ویلي چې «امریکايي وحشیان» همیشه د خپلو درنو تلفاتو غچ له عامو افغانانو څخه اخلي او ځکه یې نن په لوګر کې د خپلې رانسکورې شوې چورلکې په انتقام کې ولسي کورونه په نښه کړل.

د طالبانو ویاند ذبیح الله مجاهد په ملګرو ملتونو هم نیوکه کړې چې په داسې ورځو کې يې ځانونه غلي کړي وي، خو د ملکي تلفاتو په کلني راپور کې بیا ناسم قضاوتونه کوي.

تراوسه امریکایانو او اشرف غني د لوګر د نن ورځې بمبار په اړه څه نه دي ویلي

د شینډنډ په بمبار کې وژل شوي ماشومان (سرچینه: د ټولنیزو اړیکو پاڼې)

دولت وزیري: د شینډنډ بمبار «افغان ځواکونو» کړی

نن ټکی اسیا (چهارشنبه، ۸ وږی، ۱۳۹۶): دفاع وزارت د هرات ولایت په شینډنډ ولسوالۍ کې د وړمې ورځ بمبار خپل ځان ته منسوب کړی او ویلي یې دي چې نوموړی بمبار «افغان هوايي ځواکونو» کړی.

وړمه ورځ د یادې ولسوالۍ د بخت اباد په سیمه کې امریکايي بې پیلوټه الوتکو د عامو خلکو کورونه بمبار کړل چې له امله یې پخپله د هرات ولایتي چارواکو د ۱۶ ښځو، ماشومانو او لویانو وژل تایید کړي.

اما د سیمې خلکو ویلي چې په پیښه کې د ښځو او ماشومانو په ګډون ۳۵ تنه عام افغانان وژل شوي.

خو دفاع وزارت تر څلوریشت ساعته چوپتیا وروسته د پيښې پړه په خپله غاړه واخیسته او ویې ویل چې په دې حمله کې يې «۱۸ مخالفین» وژلي دي. د یاد وزارت ویاند دولت وزیري وايي:

«د بمبار په سیمه کې د مخالفینو یو زندان و، په زندان کې افغان سرتیري هم د بندیانو په توګه ساتل کیدل، هغه څو تنه سرتیري چې له بمبار وروسته په تیښته بریالي شوي، وايي چې هلته ملکي کورونه نه وو».

خو جنرال وزیري دا نه ده څرګنده کړې چې که فرضا بمبار د «افغان ځواکونو» عمل هم وي، ولې يې د طالبانو هغه زندان په نښه کاوه چې پخپله د دوی د عسکرو شتون په کې یقیني وو؟!.

نوموړی وايي چې دفاع وزارت د ولسي خلکو د مرګ ژوبلې د اصلي حقیقت د څیړلو په موخه سیمې ته پلاوی استولی. په عین حال کې د هرات ولایت ویاند جیلاني فرهاد هم د یو تحقیقاتي هیئت د لیږلو خبر ورکړی.

خو دواړو چارواکو دا نه دي ویلي چې کله پلټنې او تحقیقات بشپړ شي، ورپسې ګام به کوم وي او له راغونډو شویو معلوماتو څخه په څه شي کې ګټه اخیستل کیږي.

دولت وزیري په داسې حال کې د شینډنډ بمبار په خپله غاړه اخلي چې د هرات د والي ویاند (جیلاني فرهاد) او د ولایتي شورا مرستیال (توریالي طاهري) په یوه خوله ویلي چې بمبار د بهرنیو ځواکونو بې پیلوټه الوتکو کړی.

.

Comments are closed.


Hit Counter provided by technology news